ARAP MENANG BESAI… Rentap (duduk, tiga kiba) begulai enggau bala bukai begambar kenang enggau bala atlit. – GAMBAR MOHD ALIF NONI |
|
SIBU: Pengawa ngatur Lumba Sarawak (SUKSAR) III 2023 dipeda pengawa ti manah dalam kalinda lumba nengeri tu. Ukai semina nyadi panggau ngelala bakat baru dalam 13 lumba tang mega meri peneleba tumu ngagai semua raban nyikap diri ungkup Lumba Malaysia (SUKMA) XXI 2024. Seraris enggau pengelebih Sarawak ti deka nyadi tuai rumah lumba besai menua ke deka diatur belabuh ari 17 ngagai 24 Ogos tu. Sapit Menteri Nembiak, Lumba enggau Pemansang Orang Dagang Sarawak, Datuk Gerald Rentap Jabu nyemetak madah, engkeman amat ngatur SUKSAR III 2023 enggau tuju nyikap diri. Kelimpah ulih ngelala bakat baru seraya mantaika kategori lumba ngagai genap zon. Nya mega ulih meri peneleba enggau malin ngagai gerempung lumba ti kurang aktif ngatur pekit kelimpah sedia napi Sukma XXI 2024. “Pengawa ngatur SUKSAR III 2023 endang manah kelimpah pelasar kepenudi ngelala atlit baru bepnau. “Tu mega nyikap komiti teknikal kitai tumu dikena napi Sukma XXI 2014 ila,” ku iya lebuh bejaku ba Pengawa Bejadi SUKSAR III 2023 di Stadium Tertutup Sibu, ditu ensanus. Ku iya, besai pengandal Premier Sarawak, Datuk Patinggi Abang Johari Tun Openg ti deka ke Sarawak nyadi champion Sukma XXI 2024 ila. Nya kebuah ku iya, pengawa ngatur SUKSAR III 2023 ulih meri peransang genap atlit Sarawak dikena nyapai tagit nyadi champion Sukma XXI 2024. SUKSAR III 2023 diatur belabuh ari 15 ngagai 18 Januari enggau bisi 13 lumba dipekit. Empat kontinjen ngarika zon bebida iya nya Zon Selatang (Kuching, Kota Samarahan, Serian), Zon Barat (Sri Aman, Betong, Sarikei), Zon Tengah (Sibu, Mukah, Kapit) enggau Zon Utara (Bintulu, Miri, Limbang). Bisi 1,365 atlit ngambi bagi pengelama empat hari lumba nya diatur. Sumber: Ruai, Suara Sarawak |
